Hjólreiðamennirnir sem slösuðust fyrr í dag sunnan við Ásbyrgi hafa verið fluttir með þyrlu til aðhlynningar á Akureyri.
Þetta staðfestir Jón Þór Víglundsson, upplýsingafulltrúi Landsbjargar, í samtali við mbl.is.
Segir hann að hjólreiðamennirnir hafi verið að hjóla meðfram Jökulsá á Fjöllum.
„Annar þeirra hafði fallið niður einhverja smá hlíð, niður í mikinn kjarrgróður og þar var búið um viðkomandi og hann svo hífður um borð í þyrlu,“ segir Jón Þór. Hinn hjólreiðamaðurinn hafi verið minna slasaður en báðir hafi verið fluttir til Akureyrar til aðhlynningar.
Útkall barst til Landsbjargar um klukkan 12:15 og voru seinustu björgunaraðilar farnir af vettvangi um klukkan 16:30. Erfitt var að nálgast svæðið.