Kílómetragjaldið ekki sanngjarnt

Fjöldi umsagna hafa borist sam­ráðsgátt vegna frumvarps til laga um kílómetragjald vegna notkunar ökutækja. Eru þar meðal annars gerðar athugasemdir við útfærslu gjaldsins og þá staðreynd að það muni leggjast jafnt á minnstu bifreiðar og stóra og þunga pallbíla, líkt og Fé­lag ís­lenskra bif­reiðaeig­enda hefur áður bent á.

Þá er bent á vandamál sem geta komið upp við rukkun ferðamanna sem koma á eigin bílum til landsins og varðandi löggildingu ökumæla, sem og hvort sama gjald eigi að vera á bifreiðar og bifhjól

Kílómetragjaldið á að taka gildi um næstu áramót og á að koma í stað bensíngjalds. 

Með frumvarpinu er áformað að greitt verði fyrir fjölda ekinna kílómetra í samræmi við þyngd ökutækja óháð flokki.

Frétt af mbl.is

Kílómetragjald á bensín- og díselbíla í samráðsgátt

Ekki sanngjarnt að Ford F150 borgi sama skatt og gamall Yaris

Margar umsagnir fordæma það að lagt sé til að kíló­metra­gjald verði föst krónu­tala fyr­ir hvern ek­inn kíló­metra af öku­tækj­um með leyfða heild­arþyngd 3.500 kg. eða minna.

Það sé jafnvel ósanngjarnt að eyðsluminni bílar borgi jafn hátt kílómetragjald og eyðslumeiri bílar, af því að þeir séu báðir undir 3,5 tonnum.

„Slit á vegum eykst með öxulþunga í veldisvexti og skatturinn verður að taka mið af því. Mengun vex einnig talsvert útfrá þyngd ökutækis, þannig það er engan vegin sanngjarnt að Ford F150 borgi sama skatt og gamall Yaris,“ segir í einni umsögninni.

Ekki í anda umhverfisverndar

„Það er ekki beinlínis í anda umhverfisverndar að lækka gjöld á ameríska bensínháka og hækka í staðinn gjöld á sparneytna bíla,“ segir í einni umsögninni.

Rök­in sem stjórn­völd bera fyr­ir einu og sama gjald­inu á bíla und­ir 3,5 tonn­um eru að þeir bíl­ar valdi svipuðu sliti og niður­broti vega, meðan þyngri bíl­ar hafi marg­falt meiri áhrif.

Fé­lag ís­lenskra bif­reiðaeig­enda (FÍB) segir að rásir í malbiki á fjölförnum þjóðvegum í þéttbýli beri þess merki að bílar sem vegi 3,5 tonn slíti vegina meiri en léttari bílar. Því vill FÍB að fyrirhugað kílómetragjald taki mið af þyngd og orku­gjafa hvers og eins bíls. 

Frétt af mbl.is

Stjórnvöld ætli að mismuna bílaeigendum

Tveggja tonna bíll kemur vel út en ekki einstæð móðir á Yaris

Ef leyfð heild­arþyngd öku­tæk­is er um­fram 3.500 kg. mun fjár­hæð kíló­metra­gjalds taka mið af heild­arþyngd út frá út­reikn­ingi á til­tekn­um þyngd­arstuðli. Gjaldið fer því hækk­andi með auk­inni þyngd tæk­is­ins.

„Ég á mínum tveggja tonna bíl með 5.7 lítra vél sem eyðir 25L/100km kem alveg svakalega vel út úr þessari breytingu, en einstæð móðir á 900kg Yaris sem eyðir 6L/100km mun borga talsvert meira en hún gerir í dag,“ segir í einni umsögninni.

Hvað með gjaldið á bíla sem koma með Norrænu?

Í nokkrum umsögnum er því velt upp hvernig rukka eigi kílómetragjald hjá ferðamönnum sem komi með eigin bíla til landsins með farþegaferjunni Norrænu og fyrir fjallabíla sem ekið er á snjó. 

Tvær umsagnir eru um kílómetragjald á bifhjólum og í þeim haldið fram að það eigi að vera lægra en á bifreiðum.

Því er einnig velt upp hvernig setja eigi upp löggilta mæla í bifreiðar þar sem allir eknir kílómetrar séu skráðir.

„Fróðlegt væri að vita hvernig nýja fyrirkomulagið á að virka fyrir fólk á landsbyggðinni, sem er knúið að keyra marga kílómetra til að komast í vinnu, til læknis, í innkaup, eða í íþróttatíma fyrir börn,“ segir í einni umsögninni. 

• Blogga um frétt