Innlent | mbl | 25.7.2024 | 14:10

Dagbjört dæmd í 10 ára fangelsi fyrir líkamsárás

Maðurinn lést í íbúð Dagbjartar í Bátavogi í Reykjavík í september. mbl.is/Kristinn Magnússon

Dagbjört Guðrún Rúnarsdóttir var dæmd í tíu ára fangelsi fyrir líkamsárás í Héraðsdómi Reykjavíkur.

Þetta staðfestir Arnar Kormákur Friðriksson, verjandi Dagbjartar, við mbl.is.

„Myndi aldrei gera honum eitt eða neitt“

Dómur var kveðinn upp í gær, en vegna sumarlokunar héraðsdóms var dómur ekki kveðinn upp í dómssal heldur sendur rafrænt á málsaðila.

Dagbjört var ákærð fyrir að hafa orðið sambýlismanni sínum að bana með því að hafa beitt manninn margþættu ofbeldi dagana 22. og 23. september sem leiddi til andláts hans.

Dæmd fyrir brot á 218. gr.

Tekist var á um ásetning Dagbjartar í málflutningi sækjanda og verjanda í aðalmeðferð málsins í júní.

Tekist á um ásetning Dagbjartar

Arnþrúður Þórarinsdóttir saksóknari vildi meina að Dagbjörtu hefði verið ljóst að hún beitti veikan mann áverkum sem ættu eftir að leiða til dauða hans. Hún lýsti árás Dagbjartar sem hrottalegri.

Arnar Kormákur sagði að áverkar á hinum látna bentu hins vegar til að hún hefði mögulega viljað meiða hann, en að Dagbjört hefði reynt endurlífgun, hringt á Neyðarlínuna, heimilað réttarkrufningu og leyft lögreglu fúslega að skoða síma hennar. Það gerði einstaklingur sem ætlaði að bana manni af ásetningi ekki.

Dómurinn komst að þeirri niðurstöðu að Dagbjört væri ekki sek um manndráp samkvæmt 211. gr. almennra hegningarlaga.

Hún er hins vegar dæmd fyrir brot á 218. gr. 2. málsgrein þar sem segir:

Hver sem endurtekið eða á alvarlegan hátt ógnar lífi, heilsu eða velferð núverandi eða fyrrverandi maka síns eða sambúðaraðila, niðja síns eða niðja núverandi eða fyrrverandi maka síns eða sambúðaraðila, áa síns, eða annarra sem búa með honum á heimili eða eru í hans umsjá, með ofbeldi, hótunum, frelsissviptingu, nauðung eða á annan hátt, skal sæta fangelsi allt að 6 árum.

Ef um stórfellt brot er að ræða getur fangelsi varðað allt að 16 árum, en líkt og áður sagði var Dagbjört dæmd í tíu ára fangelsi.