Maður sem lögregla handtók í gær, vegna gruns um akstur undir áhrifum ávana- og fíkniefna sem og að aka sviptur ökuréttindum, reyndist vera eftirlýstur vegna skýrslutöku.
Þetta segir Marta Kristín Hreiðarsdóttir, deildarstjóri upplýsinga- og áætlunardeildar lögreglunnar á höfuðborgarsvæðinu, í samtali við mbl.is.
Maðurinn var handtekinn í hverfi 105. Hann var færður á lögreglustöð í hefðbundið ferli, en við nánari skoðun reyndist hann eftirlýstur.
Marta segir að skýrsla hafi verið tekin af manninum í kjölfar handtökunnar. Að skýrslutöku lokinni var maðurinn látinn laus.