Rúmlega 600 manns hafa skráð sig í Facebook-hópinn Skutl til og frá Egilsstaðaflugvelli til þess að mótmæla gjaldtöku á bílastæðum við flugvöllinn.
Flestir sem eru í hópnum eru mótfallnir gjaldtökunni og reyna að komast hjá henni með því að skutla og sækja farþega til og frá flugvellinum gjaldfrjálst.
Austurfrétt greindi fyrst frá.
Isavia hóf gjaldtöku við innanlandsflugvelli í Reykjavík, Akureyri og Egilsstöðum í lok júní mánaðar og hafa fengið misgóð viðbrögð.
Fyrstu 14 klukkustundirnar á Egilsstaðaflugvelli eru gjaldfrjálsar en eftir það er greitt 1.750 krónur fyrir sólarhringinn. Eftir sjö daga lækkar sólarhringsverðið í 1.350 krónur og eftir 14 daga lækkar það í 1.200 krónur.