„Þetta gerist nú stundum að loknum góðviðrisdegi þegar andar af hafi á sumrin. Þokan er úti á sjó og kemur svo inn um kvöldið“, segir Teitur Arason, veðurfræðingur hjá Veðurstofu Íslands um þétta þoku sem liggur yfir höfuðborgarsvæðinu um þessar mundir.
Segir Teitur í samtali við mbl.is að um vestanátt sé að ræða og þokan hafi fyrst komið í Keflavík klukkan 19 í kvöld og sé því ekki einungis bundinn við höfuðborgarsvæðið.
„Það er þoka nokkuð víða á landinu. Það er líka þokusúld fyrir norðan,“ segir Teitur og bætir við.
„Þetta verður viðloðandi á höfuðborgarsvæðinu í nótt og svo ætti að létta aðeins til um tíma í fyrramálið en síðan fer að rigna aftur síðdegis á morgun.“
Teitur segir að algengara sé að svona þoka komi á sumrin en hennar hafi lítið orðið vart núna í sumar.