Ökumaður sem lögregla stöðvaði í umferðinni framvísaði ökuskírteini tvíburabróður síns, en hann sjálfur var án ökuréttinda. Maðurinn á yfir höfði sér ákæru.
Þetta kemur fram í dagbók lögreglunnar á höfuðborgarsvæðinu. Dagbókin nær til verkefna lögreglu frá klukkan 17 í gær til 05 í morgun.
Maðurinn á yfir höfði sér ákæru vegna brots á hegningarlögum og umferðarlögum.
„Lögreglumenn létu ekki gabbast af þessari tilraun ökumannsins og á ökumaðurinn yfir höfði sér kæru vegna rangra sakargifta og skjalafals ásamt akstri án ökuréttinda,“ segir í dagbókinni.
Það var lögreglustöð þrjú sem sinnti málinu, en hún sinnir verkefnum í Kópavogi og Breiðholti.