Umfangsmiklar aðgerðir voru við Kerlingafjöll í dag þegar þyrla Landhelgisgæslunnar var kölluð út vegna göngumanns sem steig ofan í hver. Um 50 manns tóku þátt í björgunaraðgerðunum.
Þetta kemur fram í tilkynningu frá Landsbjörgu. Björgunarsveitafólk, sjúkraflutningamenn og Landhelgisgæslan tóku höndum saman í aðgerðum dagsins.
Útkall vegna slyssins barst Landhelgisgæslunni þegar klukkan var að ganga tvö.
Slæmt skyggni var á svæðinu og gekk erfiðlega að staðsetja manninn. Röng staðsetning var gefin upp í fyrstu og ekki var ljóst hvort að þyrlan næði að nálgast manninn.
Björgunarsveitir frá Selfossi, að Hellu og uppsveitum Árnessýslu réttu fram hjálparhönd ásamt sjúkraflutningafólki frá Heilbrigðisstofnun Suðurlands.