Lægð nálgast landið úr suðri og veldur hún sunnanátt með rigningu á stærstum hluta landsins í dag.
Þetta kemur fram í hugleiðingum veðurfræðings á Veðurstofu Íslands.
„Undir kvöld má búast við strekkings vindi og talsverðri eða mikilli rigningu á sunnanverðu landinu og geta vöð yfir óbrúaðar ár orðið illfær eða alveg ófær vegna vatnavaxta. Norðaustantil á landinu verður hærra undir skýin og lengst af lítil eða engin úrkoma og getur hiti náð í 18-19 stig á þeim slóðum þegar best lætur,“ segir í hugleiðingunum.
Á morgun gera spár ráð fyrir að lægðin verði á sveimi skammt suðvestur af landinu.
„Vindur minnkar eftir því sem líður á morgundaginn. Sunnanlands má búast við rigningu með köflum. Í öðrum landshlutum ætti að rofa til og eitthvað að sjást til sólar, en stöku skúrir geta þó látið á sér kræla,“ segir í hugleiðingunum.