Unglingspiltur réðst á lögreglumann með barefli við handtöku. Hann var í kjölfarið vistaður í fangaklefa.
Þetta kemur fram í dagbók lögreglunnar á höfuðborgarsvæðinu. Dagbókin nær til verkefna lögreglu frá klukkan 17 í gær til 05 í morgun.
Lögreglu hafði verið tilkynnt um þrjá unglinga að brjóta rúðu á húsi í íbúahverfi í Kópavogi. Þeir voru farnir þegar lögregla kom á vettvang en komu aftur og brutu aðra rúðu. Aftur komu þeir sér undan lögreglu.
Svo voru þeir tilkynntir að brjóta rúðu í strætisvagnaskýli. Lögregla hafði þá upp á drengjunum og kom í ljós að þeir voru með kúbein, hamar og hníf meðferðis.
Einn drengjanna réðst þá á lögreglumann með barefli við handtöku þremenninganna áður en hann var yfirbugaður.
Í dagbók lögreglu segir að tveir drengjanna séu undir 18 ára aldri og einn þeirra undir 15 ára aldri. Sá sem réðst á lögreglumanninn var 18 ára og var vistaður í klefa. Hinir tveir voru fluttir í önnur úrræði í samráði við foreldra og barnaverndarnefnd.
Þá segir að einn drengjanna hafi ítrekaðar verið með líflátshótanir í garð lögreglumanna. Drengirnir eiga yfir höfði sér fjölda kæra vegna málsins.