Miðað við breytingar í spá Evrópsku reiknimiðstöðvarinnar frá í gær sleppur enginn landshluti við vætu um verslunarmannahelgina.
Frá þessu er greint á veðurvefnum Blika.is og útskýrt að breytingin feli í sér að djúp lægð, sem fer fyrir austan land, verði líklega nærgöngulli um leið og henni berst aukinn kraftur á föstudag.
Lægðinni er þannig spáð nánast upp að landsteinunum á laugardag og í stað þess að halda áfram í rólegheitunum í átt til Skotlands eins og áætlað var hægir hún á sér og verður frekar á hringsóli.
„Það hefur mikil áhrif,“ segir á Bliku. Fyrst og fremst verði meira úr rigningunni auk þess sem nýr bakki fari með vestur og suðurströndinni á laugardag.
Eins og fyrr segir er um að ræða nokkra breytingu frá spá gærdagsins en þá sagði að mögulega yrði besta veðrið á höfuðborgarsvæðinu ef horft væri til vinds, hita og líkinda á þurru veðri.
Þá sagði jafnframt að á laugardag yrði hlýtt loft, en þó hvasst, norðan- og norðvestan til á landinu. Nú gera spár aftur á móti ráð fyrir að minna verði úr hlýja loftinu norðan- og norðvestan til og jafnframt að meira verði úr vindi.
Auk þess segir í færslunni að nýja spáin geri ráð fyrir vætu á öllum landshlutum um helgina. Mestsuðaustan til og á Austfjörðum, en líka um norðvestanvert landið einkum framan af eða fram á laugardag, í kjölfarið verði síðan líklega þurrt.
Breytinguna má sjá á kortinu hér að neðan.
Það sýnir mun á laugardagspá ECMWF í morgun á spánni sem reiknuð var í gærmorgun, að því er fram kemur á Bliku. Loftþrýstingur er þannig lægri yfir Íslandi og hærri vestur af Skotlandi, allt til marks um það að sjálfri lægðinni sé nú spáð nær Íslandi.
GFS-spáin fyrir laugardag er með öðrum brag, lægðin fjarlægari og nær síður að draga inn í sig rakt loft sem fyrir er í suðri. Vegna þessa munu þeir sem skoða staðspár af miklum móð sjá nokkurn má á spám m.a. Veðurstofunnar og Bliku, segir á Bliku.