Ökumaður bifreiðar sem valt í Hafnarfirði í gærkvöldi er grunaður um að hafa ekið yfir á rauðu umferðarljósi og misst stjórn á bifreiðinni með þeim afleiðingum að hún valt.
Þetta kemur fram í dagbók lögreglu sem fór á vettvang á Reykjavíkurvegi í Hafnarfirði og rannsakaði slysið.
Ökumaðurinn var fluttur með sjúkrabifreið á bráðamóttöku. Ekki er vitað um líðan ökumannsins, en bifreiðin var dregin í burtu af dráttarbifreið.
Tilkynnt var um aðra bílveltu rétt fyrir miðnætti, nálægt Sjálandsskóla í Garðabæ. Þá varð eignatjón og minniháttar áverkar á ökumanni, sem var þó fluttur á slysadeild.
Lögreglan á lögreglustöð fjögur, sem sinnir Grafarvogi, Árbæ og Mosfellsbæ, sinnti útkalli þar sem ekið hafði verið á einstakling á hlaupahjóli.
Ökumaður bifreiðarinnar nam ekki staðar og stakk af. Einstaklingurinn á hlaupahjólinu hlaut minniháttar áverka, en málið er í rannsókn.