Nokkuð myndarleg lægð er suðvestur af landinu og munu skil hennar þokast norður land í dag, að því er segir í hugleiðingum veðurfræðings Veðurstofu Íslands.
Spáð er rigningu norðanlands, en að dragi úr vætu sunnan heiða. Þar verði stöku skúrir síðdegis.
Norðvestan til á landinu verði norðaustan kaldi eða stinningskaldi en annars hægari vindur. Hiti á bilinu 8 til 16 stig.
Lægðin verður sunnan við land á morgun og gengur í stífa austan- og norðaustanátt.
„Á Suðaustur- og Austurlandi er spáð nokkuð samfelldri rigningu, en dálítilli vætu fyrir norðan og vestan. Síðdegis rignir um tíma í flestum landshlutum og austast á landinu má búast við talsverðri úrkomu,“ segir í hugleiðingum veðurfræðings.
Þar segir að annað kvöld dragi úr vætu víðast hvar, en þá fari að bæta í vind syðst á landinu. Um nóttina og fyrri part laugardags sé útlit fyrir austan hvassviðri, þar á meðal í Vestmannaeyjum.
„Þegar líður á laugardaginn dregur úr vindi, dálítil væta með köflum víða um land, en lengst af þurrt og sæmilega hlýtt á vesturhluta landsins og í innsveitum á Norðurlandi.“