Skjálftum fer hægt fjölgandi á Sundhnúkagígaröðinni.
„Samkvæmt líkanreikningum er nægur þrýstingur búinn að byggjast upp í kerfinu til að koma af stað nýjum atburði á næstu dögum,“ segir í tilkynningu frá Veðurstofu Íslands.
Þar segir einnig að GPS-mælingar sýni að hægt hafi örlítið á landrisinu síðustu daga. Þegar sú þróun í landrisi fari saman við jarðskjálftavirkni eins og mældist á Sundhnúkagígaröðinni í gær geti það gefið vísbendingar um að það styttist í næsta kvikuhlaup eða eldgos.
„Viðbragðsáætlanir Veðurstofunnar miða við að kvikuhlaup gæti farið af stað hvenær sem er næstu daga og það jafnvel endað með eldgosi. Ef atburðarásin verður sambærileg og í aðdraganda fyrri eldgosa, gæti fyrirvarinn verið mjög stuttur.“