Innlent | mbl | 3.8.2024 | 11:27 | Uppfært 12:10

Þyrlan kölluð út á Grænlandssund

TF-GRO á Akureyri í morgun. mbl.is/Þorgeir

Þyrlusveit Landhelgisgæslunnar annaðist útkall, djúpt norður af Vestfjörðum, vegna veikinda um borð í skemmtiferðaskipi á Grænlandssundi snemma í morgun.

Þetta kemur fram í færslu Gæslunnar á Facebook.

Þyrlusveitin var kölluð út í nótt og tók á loft frá Reykjavíkurflugvelli laust eftir klukkan fjögur og tók stefnuna á Ísafjörð þar sem fyllt var á eldsneytistanka þyrlunnar.

Þaðan var flogið á haf út og á sjöunda tímanum í morgun var TF-GRO komin að skemmtiferðaskipinu.

Vonskuveður

Í færslunni segir að töluverður vindur hafi verið á staðnum eða um 40 hnútar sem samsvarar rúmlega tuttugu metrum á sekúndu. Þá var éljagangur og um fjögurra til fimm metra ölduhæð.

Áhöfn skemmtiferðaskipsins tók á móti tengilínu frá þyrlunni á þyrlupalli skipsins og fór sigmaður þyrlusveitarinnar um borð í skipið og undirbjó sjúklinginn fyrir hífingu um borð í þyrluna.

Segir að vel hafi gengið að koma manninum um borð í þyrluna og var flogið með hann til aðhlynningar á Sjúkrahúsið á Akureyri.

Áhöfnin á TF-GRO verður til taks á Akureyri til morguns og hin vaktin verður í viðbragðsstöðu í Reykjavík ef á þarf að halda.