Björguðu ökumanni en skildu bílinn eftir í ánni

Björgunarsveitir aðstoðuðu fyrr í dag erlendan ferðalanga sem lent hafði í vandræðum er hann reyndi að þvera Hólmsá á bifreið sinni.

Ökumaðurinn var kominn út í miðja á þegar hann lenti í vandræðum við hinn bakkann og treysti sér ekki yfir. Ökumaður bílsins komst þó út úr honum og upp á bakka en hann var kaldur og hrakinn þegar björgunarsveitir bar að garði.

Björgunarsveitum tókst ekki að ná bílnum upp úr ánni og var hann því skilinn eftir, en að sögn viðbragðsaðila hefur bíllinn líklega strandað á grjóti.

Pálmar Atli Jóhannesson, formaður björgunarsveitarinnar Stjörnunnar sem sinnti útkallinu ásamt björgunarsveitinni Lífsgjöf, segir í tilkynningu til fjölmiðla, að hann hafi sjaldan séð jafn mikið vatn í Hólmsá og í dag.