Tjá sig ekki um skoðanir einstakra starfsmanna
Setja bókamerki
Mennta- og barnamálaráðuneytið kveðst ekki tjá sig um skoðanir einstakra starfsmanna.
Á þessa leið svarar ráðherra fyrirspurn mbl.is, sem varðar gagnrýni Arnórs Guðmundssonar fyrrverandi forstjóra Menntamálastofnunar.
Fyrirspurnin var lögð fram í kjölfar viðtals Morgunblaðsins í lok júlí við Arnór, þar sem hann sagði meðal annars að gæðamálum væri ábótavant í menntakerfinu.
Segir skýrsluna hafða til hliðsjónar
Arnór gagnrýndi meðal annars að ráðuneytið hefði ekkert gert við niðurstöður skýrslu sem Menntamálastofnun tók saman eftir að hafa lokið við ytra mat á öllum grunnskólum landsins.
Morgunblaðið og mbl.is óskuðu í framhaldinu eftir svörum við því hvernig ráðherra hefði brugðist við niðurstöðum skýrslunnar sem Arnór vitnaði í.
Í svari ráðherra segir að skýrslan, eins og aðrar, sé höfð til hliðsjónar í störfum ráðuneytisins.
„Mennta- og barnamálaráðuneytið vinnur að gerð nýs námsmats sem mun koma í stað samræmdra könnunarprófa samkvæmt tillögum starfshóps skipuðum fulltrúum skólasamfélagsins,“ segir í svarinu.
Á ábyrgð ráðuneytisins
Forstjórinn fyrrverandi fann einnig að því að samræmdu könnunarprófið hefðu verið lögð af. Sagði hann það á ábyrgð ráðuneytisins og að stofnunin hefði aldrei fengið nægilegt fjármagn til að leggja prófin fyrir.
„Það var alltaf ljóst að við gerðum þetta bara með einhverju bráðabirgðakerfi til þess að byrja með. Síðan var talað um að við þyrftum að fara í útboð á almennilegu kerfi, kaupa fullþróað prófakerfi. Það kom aldrei stuðningur eða fjármagn til þess,“ sagði Arnór.
„Við sátum uppi með mjög gallað kerfi, sem á endanum sannaðist þegar það hrundi tvisvar. Þannig að við fengum bara aldrei þann stuðning og fjármagn sem þurfti til þess að taka upp almennileg kerfi og leggja fyrir prófin með því,“ bætti hann við.
/frimg/1/36/25/1362554.jpg)
Vísað til „fréttaflutnings“
Ráðherra svarar á þessa leið:
„Ástæður afnáms samræmdra könnunarprófa koma m.a. fram í skýrslu starfshópsins og í fréttaflutningi ráðuneytisins um hið nýja námsmat.“
Með „fréttaflutningi“ er að líkindum átt við tilkynningar sem birtast af og til á vef ráðuneytisins, en fjallað hefur verið um umrædd áform um nýtt námsmat á mbl.is undanfarnar vikur.
„Ráðuneytið tjáir sig ekki um skoðanir einstakra starfsmanna,“ segir svo að lokum í svari ráðherra.
Óvissa undir Ásmundi: „Sorglegt og alvarlegt“
Alvarlegt vinnuslys í Grindavík
Hvalurinn komst loks á flot
Óvenjulegar aðstæður og lítið af vísbendingum
Bera fyrir sig breytingar og nýja stofnun
Tjá sig ekki um skoðanir einstakra starfsmanna
Tómur bílaleigubíll fundinn: Ræsa út leitarhunda