Ferðamenn ekki jafn margir síðan árið 2018

Brottförum erlendra farþega frá landinu um Keflavíkurflugvöll fjölgaði um tæplega 1.300 ferðir milli júlímánaða, ef marka má tölur frá Ferðamálastofu. 

Þetta er því 0,5% hækkun milli ára en brottfarir í nýliðnum júlímánuði voru 277 þúsund talsins, en í júlí í fyrra voru þær um 275 þúsund. 

Ekki hefur verið svipaður brottfarafjöldi síðan í júlí árið 2018.  

Langflestir ferðamenn Bandaríkjamenn

Flestar brottfarir í júlí voru tilkomnar vegna Bandaríkjamanna, sem voru um þriðjungur ferðamanna eða um 99 þúsund talsins. Þeir voru þó talsvert færri í ár en þeim fækkaði um  12,8% frá því í júlí í fyrra. 

Næstflestir ferðamenn í júlí voru Þjóðverjar, sem voru um 18.400 talsins eða 6,7% heildarbrottfara í mánuðinum. Þeir voru líka mun færri en í fyrra, eða 16,1% færri en júlí 2023. 

Brottfarir Pólverja voru í þriðja sæti eða 5,2% af heild júlímánuðs, og Bretar í því fjórða og voru um 4,6% brottfara. 

Ferðum Íslendinga fækkar

Frá áramótum hafa um 1,24 milljónir erlendra farþega farið frá Íslandi, en á sama tíma í fyrra voru brottfarir þeirra um 1,23 milljónir. Því er um að ræða 0,9% fjölgun milli ára. 

Frá áramótum hafa um 360 þúsund Íslendingar farið utan en á sama tíma í fyrra voru brottfarir þeirra um 364 þúsund. 

Þá voru brottfarir Íslendinga í júlímánuði jafnframt færri en í fyrra, tæplega 63 þúsund, en ferðirnar voru um átta þúsund fleiri í júlí 2023.

• Blogga um frétt