„Málið tilheyrir fortíðinni“
Setja bókamerki
Birgir Halldórsson og Jóhannes Páll Durr neituðu að tjá sig er þeir mættu fyrir dómara í Héraðsdómi Reykjavíkur í dag til að bera vitni í málinu gegn Pétri Jökli Jónassyni.
„Málið tilheyrir fortíðinni,“ sagði Jóhannes.
Auk Birgis og Jóhannesar, báru Páll Jónsson og Daði Björnsson vitni fyrir dómi í dag en þeir hafa verið dæmdir í fimm til níu ára fangelsi í Landsrétti fyrir að hafa reynt að smygla tæplega 100 kg af kókaíni til landsins frá Brasilíu.
Héraðsdómur vísaði málinu frá í byrjun júní þar sem ekki þótti nægilega skýrt í ákæru hver aðkoma Péturs hefði verið í málinu. Í lok sama mánaðar felldi Landsréttur ákvörðunina úr gildi og bar því héraðsdómi að taka málið til meðferðar.
Lítið kom út úr vitnaleiðslunum yfir fjórmenningunum í dag að öðru leyti en að mennirnir sögðust annaðhvort ekki þekkja Pétur eða hann ekki tengjast málinu.
Málið búið fyrir Birgi
Páll bar vitni í gegnum fjarfundarbúnað frá Kvíabryggju og sagðist eingöngu hafa verið í samskiptum við Birgi og Jóhannes. Hann sagðist ekki kannast við Pétur.
Birgir mætti fyrir dóm og tjáði dómþingi strax að hann ætlaði hvorki að svara spurningum né tjá sig um málið.
Hann sagðist ekki samþykkja að vera bundinn vitnaskyldu og að hann hefði ekki þurft að tjá sig ef þeir hefðu allir verið ákærðir samtímis. Ákæra var ekki gefin út á hendur Pétri fyrr en í maí á þessu ári.
Birgir sagðist aldrei hafa átt í samskiptum við Pétur en játaði að þekkja til hans þar sem þeir leigðu íbúðir í sama húsnæði árið 2015.
Birgir sagði að fyrir honum væri málið búið. Það hefði farið fyrir tvö dómsstig og hann setið í fangelsi í tvö ár.
Pétur ekki sá sem kom honum inn í málið
Eftir hádegishlé bar Jóhannes Páll vitni og var Pétur ekki viðstaddur þá.
Jóhannes Páll hafði sömu afstöðu og Birgir. Hann byrjaði skýrslutöku sína á að lesa upp stutta yfirlýsingu þar sem hann sagði málið tilheyra fortíðinni.
Jóhannes neitaði að gefa skýrslu en tók fram að einstaklingurinn sem leiddi hann inn í málið væri ekki ákærði. Spurður hver það hefði verið neitaði Jóhannes að svara.
Dómari benti Jóhannesi á að almenn vitnaskylda ríkti í landinu, en hann neitaði að tjá sig.
Spurður hvort hann hefði rætt við Birgi um daginn í dag svaraði Jóhannes neitandi.
Jóhannes vísaði í fyrri skýrslutökur, bæði hjá lögreglu og fyrir dómi, og sagðist hafa greint satt og rétt frá þar.
Skýrslutaka Jóhannesar í dag tók rúmlega þrjár mínútur.
„Við munum grípa inn í“
Éljagangur en síðan slydda eða rigning
Fær leyfi til að rífa bústaði
Býst við meiri aðsókn í janúar
Búið að opna Hellisheiði
Skoða ráðstafanir vegna mikillar kuldaspár
Fuglager í Grindavík: „Þetta var bara pínu magnað“