Starfsmenn álversins fara í hinseginfræðslu

Starfsmönnum álversins í Straumsvík er gert að fara á ýmis námskeið af hálfu ISAL, Rio Tinto á Íslandi, og þar á meðal í hinseginfræðslu. Starfsmenn fá greitt fyrir að mæta á námskeiðin.

Í svari ISAL við fyrirspurn mbl.is kemur fram að fræðsla starfsfólks sé einn af lykilþáttum í rekstri ISAL og að fræðslan snerti alla þætti starfseminnar. Er henni ætlað að bæta hæfni, öryggi og líðan starfsfólks.

„Mannréttindi, jafnrétti og sálfélagsleg líðan hefur á seinni árum fengið aukið vægi í fræðslu á vegum fyrirtækisins,“ segir í svari fyrirtækisins. 

Mæting ekki valfrjáls

Bjarni Már Gylfason, leiðtogi samfélagsmála og samskipta hjá ISAL, staðfestir við mbl.is að mæting sé ekki valfrjáls. Starfsmenn sem þurfa að mæta á námskeið utan vinnutíma fá greitt fyrir það.

„Almennt eru námskeið haldin á dagvinnutíma en þar sem stór hluti starfsfólks vinnur á vöktum geta ekki öll komið á vinnutíma,“ segir í svari fyrirtækisins. 

Á síðasta ári voru fræðslustundir starfsmanna 9.145 sem jafngildir því að hver starfsmaður ISAL hafi að meðaltali varið 25 klukkustundum í þjálfun og fræðslu, að er kemur fram í svarinu.

„Fræðsla, endurmenntun og reglubundin þjálfun er hluti af daglegu starfi okkar. Menntun og fræðsla starfsfólks er í gangi allt árið og hefur mikil og jákvæð áhrif á árangur fyrirtækisins.“

Íslenskunám fyrir erlenda starfsmenn

Í svarinu koma einnig fram dæmi um námskeið sem verða í haust:

• Málmsprengihættur
• Lásanámskeið
• Rafmagnshættur í kerskála
• Umhverfisslys og viðbrögð við þeim
• Hættuleg efni
• Green-belt þjálfun (gæðastjórnun/verkefnisstjórnun)
• Lokuð rými
• Fallvarnarnámskeið
• Fræðslunámskeið um lífeyrismál
• Íslenskunám – ætlað erlendu starfsfólki
• Fræðsla um hinseginleika
• Brúkrananámskeið

„Auk þess geta verið margvísleg sérhæfð námskeið á einstaka fagsviðum sem starfsfólk okkar þarf að sækja,“ segir í svarinu.

• Blogga um frétt