Alma Mjöll Ólafsdóttir er nýr framkvæmdastjóri þingflokks Vinstri grænna.
Hún tekur við starfinu af Sunnu Valgerðardóttur sem hefur störf á skrifstofu flokksins þar sem hún verður samskipta- og miðlunarstjóri. Sunna tók við starfi framkvæmdastjóra í maí.
Í tilkynningu frá Vinstri grænum segir að Alma Mjöll hafi starfað sem rannsóknarblaðakona á Heimildinni og hafi í störfum sínum lagt áherslu á málaflokka eins og húsnæðismál, útlendingamál og heilbrigðismál. Hún hafi unnið til blaðamannaverðlauna Íslands árið 2020 fyrir umfjöllun um loftlagsmál.
Þá sé hún menntuð í sviðslistum frá Listaháskóla Íslands og hafi áður starfað sem leikstjóri.