Mun ekki aðhafast meira í málinu

„Hann heyrði í mér hann Eyþór, sem er annar meðlimurinn í þessari hljómsveit, og hann bað mig persónulega afsökunar og þessu máli er bara lokið af minni hálfu,“ segir Skær­ing­ur Óli Þór­ar­ins­son, íbúi í Vestmannaeyjum, sem kom að heimili sínu í rúst eftir að hafa leigt það út yfir Þjóðhátíð.

Mbl.is greindi frá málinu í síðustu viku þar sem fram kom að liðsmenn hljóm­sveit­ar­inn­ar HubbaBubba og hóp­ur tengd­ur þeim hafi haft hús Skærings á leigu yfir versl­un­ar­manna­helg­i og skilið gífurlega illa við það.

Voru glugga­kist­ur und­ir­lagðar af notuðum nikó­tín­púðum og tyggjók­less­um, rúða, glös og skáp­ar höfðu verið brot­in, kerta­stjak­ar rifn­ir af veggj­um og rusl út um allt hús.

Frétt af mbl.is

Myndskeið: Þjóðhátíðargestir lögðu heimilið í rúst

Almennileg afsökunarbeiðni kom frá liðsmanni

Tvíeykið HubbaBubba samanstendur af þeim Eyþóri Aroni Wöhler og Kristali Mána Ingasyni. Í samtali við mbl.is sögðust þeir ekki hafa gist í húsinu, þó hópurinn á heimilinu hafi verið á þeirra vegum.

Segir Skæringur að honum hafi fundist vanta almennilega afsökunarbeiðni frá þeim og hafi hún komið frá Eyþóri Aroni Wöhler í kjölfar fréttaflutnings mbl.is af málinu.

„Það var svona það sem að lokaði þessu endanlega fyrir mér, að fá almennilega afsökunarbeiðni,“ segir Skæringur.

„Maður er svo sem alveg brenndur af þessu þannig séð en ég mun allavega ekkert aðhafast neitt meira í þessu,“ bætir hann við.

• Blogga um frétt