Bifhjólamaður var handtekinn og fluttur á lögreglustöð þar sem hann var vistaður í fangaklefa eftir að lögregla hafði veitt honum eftirför í dag.
Þetta kemur fram í dagbók lögreglunnar á höfuðborgarsvæðinu.
Maðurinn ók hjólinu, sem skorti bæði skráningarmerki og hliðarspegla, á um 150 kílómetra hraða þar sem leyfilegur hámarkshraði er 80 km/klst. Bifhjólamaðurinn ók einnig á gangstétt á yfir 110 km/klst áður en för hans tók enda, þegar hann ók á lögreglubifhjól.
Reyndist maðurinn vera án ökuréttinda og er grunaður um að hafa verið undir áhrifum fíkniefna. Hann hlaut ekki áverka af atvikinu.
Þá hafði ökumaður stöðvað umferð á Vesturlandsvegi í dag en ók af stað aftur áður en lögregla kom á vettvang. Lögregla handtók manninn síðan seinna sökum gruns um ölvun við akstur.
Einnig var tilkynnt um mann til ama í miðbænum og um þjófnað í verslunarmiðstöð.