Bjóða upp á ferðir til ársins 1238

Nú hefur sýningin teygt sig út fyrir landsteina. Safnið heldur úti einni sýningu í Ungverjalandi í borginni Eger og tveimur sýningum í Vestfold-fylki í Noregi.

Að sögn Freyju Rutar Emilsdóttur framkvæmdastjóra safnsins er Vestfold-fylki í mikilli þróunarvinnu með víkingatengda ferðaþjónustu og er sýningin einn liður í þeirri vinnu.

Ferðast aftur til ársins 1238

Á sýningunum gefst gestum tækifæri til að taka þátt í Örlygsstaðabardaga í gegnum sýndarveruleika og ferðast þá aftur til Skagafjarðar árið 1238, þegar bardaginn átti sér stað.

Að sögn Freyju hafa Norðmenn tekið einstaklega vel í sýninguna enda vel tengdir við landið. „Það er vel tekið í þetta enda tengist þetta Norðmönnum því Snorri Sturluson dvaldi mikið í kringum Túnsberg þegar hann var í Noregi. Þá er þetta líka sagan af því hvernig Norðmenn náðu yfirráðum á Íslandi,“ segir hún.

Spurð hvernig hafi tekist til að halda sýninguna í Ungverjalandi segir Freyja það hafa gengið vel. Hins vegar hafi reynst erfiðara að finna beinar víkingatengingar við landið.

Verkefnið er fyrsta skrefið í samvinnu „1238 The Battle of Iceland” við söfnin í Noregi og Ungverjalandi þar sem unnið er að því að smíða sýndarveruleika þar sem hægt verður að taka þátt í sögulegum atburðum þeirra landa.

Þannig er unnið að því að smíða sýndarveruleikasýningu af örlagaríkum atburðum Ungverjalands frá árinu 1552. Þangað til sú sýning er tilbúin mun Örlygsstaðabardaginn vera í boði fyrir gesti.

Áhuginn er víðar

Safnið á Sauðárkróki aðstoðar einnig söfnin tvö í Noregi við að setja upp sína eigin sýndarveruleikasýningu. Sýningin um Örlygsstaðarbardaga verður aftur á móti enn í boði þegar þeirra eigin sýning er tilbúin.

Þá segir Freyja að mikill áhugi sé á sýningunni í öðrum löndum og hafa þau meðal annars verið í samtali við írsk, sænsk og kanadísk söfn til þess að bjóða upp á upplifun í þeim löndum með aðstoð sýndarveruleikatækninnar.

Umfjöllunin birtist fyrst í Morgunblaðinu á föstudaginn.