Skjálfti af stærðinni 2,4 mældist norðan Grindavíkur, við Hagafell rétt austur af Þorbirni, klukkan 13.25 í dag.
Jarðskjálftinn er sá stærsti sem riðið hefur þar yfir frá því álíka stór skjálfti, 2,5 að styrkleika, mældist þar um hádegi í gær.
Þá hafði ekki jafnstór skjálfti mælst frá því síðasta eldgos við Sundhnúkagíga hófst í maí.
Hér má fylgjast með beinni útsendingu vefmyndavéla mbl.is:
Jarðvísindamenn telja að eldgoss eða kvikuhlaups megi vænta á hverri stundu, en sú staða hefur verið uppi síðustu daga.
Skjálftum hefur fjölgað dag frá degi í kringum Sundhnúkagígaröðina.
Um 110 skjálftar mældust í gær, 18. ágúst, en í síðustu viku voru þeir um 60 til 90 á sólarhring.