Fólk láti vita af lekum

Nokkrir lekar hafa komið upp í dag og kvöld á svæðinu þar sem heitavatnslaust var fyrr í vikunni, og hvetja Veitur þá sem hafa orðið fyrir slíku að hringja í neyðarsíma þeirra.

Í tilkynningu sem Veitur birtu á heimasíðu sinni kl. 22.40 segir að þegar vatni sé hleypt aftur á viðamikið lagnakerfi geti komið upp lekar í dreifikerfinu.

„Í dag og kvöld hafa komið upp nokkrir lekar og hafa íbúar á þeim svæðum orðið fyrir því að það er lokað fyrir heita vatnið til að hægt sé að stöðva lekann. Svæðin eru þó lítil og afmörkuð við einstaka götur.“

Frétt af mbl.is

Myndskeið: Lögn fór í sundur og garðurinn á flot

Í tilkynningunni kemur fram að Veitur séu að vinna í viðgerðum, en það tekur einhvern tíma þar til því lýkur.

„Við viljum vita af öllum lekum sem verða í kerfinu okkar og mikilvægt að hringja í neyðarsímann okkar 516 6161.“

Þá benda Veitur einnig á spurt og svarað um bilanir á heimasíðu Veitna, veitur.is

mbl.is bárust ábendingar fyrr í kvöld frá íbúum innan svæðisins um að sums staðar hefði ekki verið neinn þrýstingur á heita vatninu og ofnar enn kaldir. 

• Blogga um frétt