Minningarstund verður haldin í Norðfjarðarkirkju á morgun klukkan 18.00 til minningar um manninn sem lést í gær af völdum voðaskots við Hálslón.
Maðurinn var á fertugsaldri og var ásamt fleirum á gæsaveiðum þegar slysið varð.
„Í þungbæru áfalli og sorg er samfélaginu styrk og huggun að koma saman,“ segir í færslu um minningarstundina á Facebook-síðu Norðfjarðarkirkju en þar kemur sömuleiðis fram að fagaðilar frá Heilbrigðisstofnun Austurlands og Rauða krossinum verði á staðnum.
Kl. 20 í kvöld var svo haldin kyrrðar- og bænastund í Heydalakirkju í Breiðdal, þar sem fólk gat komið og veitt hvert öðru stuðning.
Þá var leikur KFA og Hattar/Hugins í 2. deild karla sem átti að fara fram í Neskaupstað í dag færður inn í Fjarðabyggðarhöll á Reyðarfirði vegna slyssins.
Fréttin hefur verið uppfærð.