„Ég virði þá ósk Sigríðar að mæta ekki til vinnu,“ segir Helgi Magnús Gunnarsson vararíkisaksóknari í samtali við mbl.is, en undir hefðbundnum kringumstæðum hefði hann átt að hefja störf í dag eftir sumarfrí.
Sigríður J. Friðjónsdóttir ríkissaksóknari krafði Helga á mánudag um að skila lyklum og fartölvu embættisins, en dró það svo til baka fáeinum tímum seinna.
Sigríður hefur óskað eftir því að Helgi verði leystur frá störfum tímabundið vegna kæru á hendur hans frá Solaris-samtökunum og vegna margumræddra ummæla hans á samfélagsmiðlum.
Helgi segir að skilaboð Sigríðar séu skýr og að hann muni virða ósk hennar um að mæta ekki til starfa á meðan beiðni hennar, um að Helgi verði leystur frá störfum, er til skoðunar í dómsmálaráðuneytinu.