Innlent | mbl | 23.8.2024 | 8:44

„Einhver tími í að hraun renni yfir Grindavíkurveg“

Úlfar Lúðvíksson, lögreglustjóri á Suðurnesjum, segir að það eigi eftir að skýrast með morgninum hvort einhverjir innviðir séu í hættu á Reykjanesskaganum vegna eldgossins sem hófst á Sundhnúkagígaröðinni í gærkvöld.

Frétt af mbl.is

Enn sjást aflögunarmerki en minni skjálftavirkni

„Mér sýnist að það verði einhver tími í það að hraun renni yfir Grindavíkurveg en það er kannski helst það sem menn hafa áhyggjur af í augnablikinu. Hraun er ekki að renna í áttina að Grindavík sem er mjög jákvætt og það gengur allt vel,“ segir Úlfar við mbl.is en viðbragðsaðilar funda nú um stöðuna á Reykjanesskaganum og eftir þann fund skýrist myndin eilítið að sögn Úlfars.

Úr þyrluferð Landhelgisgæslunnar og almannavarna yfir gosstöðvarnar í nótt. mbl.is/Eyþór

Úlfar segist ekki hafa heyrt neitt annað en að rýmingin hafi gengið vel í gærkvöld. Hann segir það eftirtektarvert og ánægjulegt að viðbragð Veðurstofunnar og almannavarna hafi gengið svona vel.

Frétt af mbl.is

Ný sprunga opnast til norðurs

„Við erum búin að bíða eftir þessu gosi í nokkrar vikur og þegar við fórum loksins í það að rýma svæðið þá fengum við eldgoss innan við hálftíma síðar. Á þessum tíma hefur ekki komið til þess að við höfum farið í rýmingu án þess að það gjósi eða það verði kvikuhlaup og ég er mjög ánægður með fagleg vinnubrögð Veðurstofunnar,“ segir lögreglustjórinn.

Úlfar Lúðvíksson, lögreglustjóri á Suðurnesjum. mbl.is/Óttar

Þekkingin orðin ansi mikil

Hann segir að þetta sýni að þekkingin sé orðin ansi mikil þótt menn geti aldrei staðfest þetta nákvæmlega en eldgosið sem hófst í gærkvöld er það níunda á Reykjanesskaganum á rúmum þremur árum og það fimmta á Sundhnúkagígaröðinni.

Úlfar segir að tekist hafi að halda Reykjanesbrautinni opinni í báðar áttir í gærkvöld og í nótt.

„Það er ekki sjálfu sér ekkert hægt að segja við því þótt ökumenn stöðvi í vegkantinum. Það fylgir svona viðburði en þetta gekk allt vel,“ segir Úlfar.