Svæðið í kringum eldgosið á Sundhnúkagígaröðinni er mjög hættulegt og mikið sprungið. Sérstaklega þegar fólk er illa búið og ekki með ljós í myrkrinu.
Þetta segir Þorbjörg Pálsdóttir aðgerðastjórnandi í vettvangsstjórn í Grindavík. Fjöldi fólks lagði leið sína að gosinu og komu enn fleiri þegar tók að dimma, enda sjónarspilið meira þegar eldgosið lýsir upp næturhimininn.
Fólk á svæðinu eru bæði Íslendingar og erlendir ferðamenn sem Þorbjörg segir marga hverja vera að koma beint úr flugi.
Björgunarsveitin Þorbjörn er á svæðinu ásamt lögreglu til að upplýsa fólk hvar það má vera og gæta þess að það gangi ekki upp að gosinu.
Mjög hvasst er á svæðinu núna. „Hraunið er úfið og erfitt yfirferðar og þótt það virki eins og stutt sé frá Grindavíkurvegi þá er þetta dágóður spotti,“ segir Þorbjörg.
Þorbjörg segir ekki hafa komið upp nein stórfengleg vandamál og að fólk hafi sýnt því skilning þegar það er beðið um að snúa við.
„Flestir fara eftir fyrirmælum.“
Nálægt Grindavíkurvegi er smá hraunstallur þar sem fólk getur staðið. Gosið sést vel þaðan. Eins og vindáttin er núna er skjól frá rokinu á stallinum og reykmökkurinn fer út yfir hafið.
Fyrir neðan útsýnisstallinn keyra björgunarsveitarmenn eftir slóða og stöðva fólk ef það ætlar lengra.
Þetta eldgos er töluvert nær Reykjanesbraut en verið hefur og sést alveg vel þaðan. Lokunarpóstur á Grindavíkurafleggjara var færður aðeins neðar svo bílaumferð getur farið aðeins inn Grindavíkurveg og lagt bílum þar.
Að sögn Þorbjargar verður vettvangsstjórn með vakt allan sólahringinn.
„Við erum að biðla til fólks að vera ekki að ganga að gosstöðvunum,“ segir Þorbjörg. Hún ítrekar að vel er hægt að sjá gosið frá Grindavíkurvegi.
Eitthvað hefur verið um að fólk leggi bílum í vegkanti við Reykjanesbrautina en það skapar stórhættu. „Sérstaklega þegar bílhurð er opnuð sem snýr út í umferðina,“ segir Þorbjörg.