Einar Þorsteinsson, borgarstjóri Reykjavíkur, verður víða um miðborgina á morgun og mun meðal annars ræsa hálfa og heila maraþonið í Reykjavíkurmaraþoni Íslandsbanka 2024, ásamt Fríðu Bjarnadóttir.

Fríða var fyrst íslenskra kvenna til að hlaupa heilt maraþon á Íslandi og í fyrsta Reykjavíkurmaraþoninu sem haldið var 1984, en henni var meinuð þátttaka í maraþoninu árinu á undan. 

Knútur Óskarsson mun síðan ræsa 10 km hlaupið, en hann er einn upphafsmanna Reykjavíkurmaraþonsins og var lengi vel formaður þess. 

Tekur í vöfflujárnið 

Einar ætlar ekki að bjóða í vöfflukaffi á morgun eins og forveri hans í starfi, Dagur B. Eggertsson, gerði iðulega á Menningarnótt. Er það vegna þess að Einar er búsettur í Breiðholti en ekki í miðborginni.

Einar ætlar þó að halda vöffluhefðinni á lofti og hyggst mæta í heimsókn til íbúa í miðborginni og baka vöfflur með þeim. 

„Ég ætla að kíkja í vöfflukaffi og kannski taka í vöfflujárnið,“ segir Einar í samtali við mbl.is.  

Heiðra Grinvíkinga

Grindvíkingar eru heiðursgestir Menningarnætur í ár og munu bjóða upp á fjölbreytta dagskrá. 

„Ég hvet alla til þess að fara niður í Ráðhús Reykjavíkur og sjá hvað Grindvíkingarnir eru að bjóða upp á og sýna þeim samstöðu,“ segir Einar. 

Einar mun einnig vígja Hörputorgið þar sem verður hægt að sjá lúðrasveitabardaga sem að sögn Einars er einn af líflegri viðburðum Menningarnætur. 

Tengdar fréttir

Reykjavíkurmaraþon

Hægðalosandi smakk óhentugt fyrir hlaup

• Tíðavörur eigi að vera jafn aðgengilegar og klósettpappír
• 14.300 hlauparar skráðir í Reykjavíkurmaraþonið
• Hleypur í minningu litlu systur sinnar
• Súkkulaðigerðin Omnom býður öllum hlaupurum upp á ís

» Fleiri tengdar fréttir

• Blogga um frétt