Innlent | mbl | 24.8.2024 | 8:11

Ágreiningurinn innan stjórnarinnar dylst engum

Ásmundur Einar Daðason, mennta- og barnamálaráðherra, segir alla sjá að mikill meiningarmunur sé innan ríkisstjórnarinnar. Hann ætlar sér þrátt fyrir það að ljúka þeim verkefnum sem hann vinnur nú að.

Þetta kemur fram í nýju viðtali við hann í Spursmálum. Þar ræðir hann m.a. þá úlfakreppu sem grunnskólakerfið er í og hvað hann telji til ráðs að taka til þess að snúa hnignun þess við.

Orðaskiptin um stöðu ríkisstjórnarinnar má sjá í spilaranum hér að ofan en þau eru einnig rakin í textanum hér að neðan.

Þola greinilega ekki hvert annað

Talandi um ríkisstjórnarsamstarfið. Þetta er ekki á vetur setjandi. Það er allt í háaloft. Þið þolið greinilega ekki hvert annað og eruð á öndverðum meiði í öllum málum. Hver ráðherra fer sínu fram, ráðherrar geta brotið lög og stjórnarskrá án þess að það hafi afleiðingar fyrir stjórnarsamstarfið. Hvernig mun þetta enda? Ætlið þið að sitja fram á haustið 2025?

„Það endar náttúrulega. Ég ætla bara að segja fyrst og taka út frá þeim verkefnum sem ég er með. Það er þannig að það eru stór frumvörp á leið inn í þingið, matsferil, skólaþjónustu, námsgagnafrumvarp, gagnafrumvarp í málefnum barna, ég er á leiðinni með æskulýðslög, barnaverndarlög og fleiri mál sem hafa tekið tíma í vinnslu. Ég ætla mér að klára þessi verkefni persónulega, koma þeim inn til þingsins. Gera þau að lögum því ég trúi á þessi verkefni og hef mikla ástríðu fyrir þeim raunar og bara elska að vinna í þessum málum á hverjum einasta degi.“

Frétt af mbl.is

Aðgerðirnar ekki hluti af neyðarviðbragði

„Hitt er auðvitað þannig að það eru innan stjórnarsamstarfsins sjáum við alveg að það eru skiptar skoðanir um ýmis mál og það þarf engan sérfræðing til að sjá það.“

Hefur þú einhverja trú á því að þú náir endurkjöri í Reykjavíkurkjördæmi norður ef þið klárið þetta kjörtímabil með sama hætti og verið hefur hér síðustu vikur og mánuði.

„Ja, við ætlum að klára þessi mál. Ég ætla að klára þessi mál...“

Það var ekki spurningin, spurningin var sú hvort þú teljir einhverjar líkur á að þú náir endurkjöri. Duga skólamáltíðirnar og gjaldfrjálsu námsgögnin til í því sambandi?

„Ég ætla bara að segja að svarið við þessu er mjög einfalt. Ég hef mjög mikla ástríðu í málefnum barna. Ég flutti mig til Reykjavíkur í framboð því mig langaði til að vinna að málefnum barna. Ég hef sett þau á oddinn, ég ætla að gera það áfram...“

Ásmundur Einar Daðason, mennta- og barnamálaráðherra er gestur Stefáns Einars í Spursmálum að þessu sinni. mbl.is/María Matthíasdóttir

Betra að gera það frá Reykjavík

Var það ekki hægt úr Norðvesturkjördæmi?

„Nei, ég hef nú útskýrt það af hverju ég vildi gera það. Vegna þess að ég vildi berjast meira fyrir því sem lyti að málefnum barna, málefnum barna í félagslega veikri stöðu og taldi heppilegra að gera það í þéttbýli og brann ekki jafn mikið fyrir öðrum verkefnum sem tengjast dreifbýlinu með sama hætti. Það var sagt af fullum heilindum og einlægleika. Mér finnst mjög gaman að vinna að þessum verkefnum. ég vil koma þeim til hafnar. Við erum að sjá breytingar gerast. Ég er stoltur af því að fylgja þeim eftir og svo verður framtíðin að sjá hvað annað ber í skauti sér. Ég held að staðan hafi verið dræmari í Reykjavík-Norður þegar ég tilkynnti framboð þar í aðdraganda síðustu kosninga en núna. Þannig að ég fylgi minni ástríðu, ég fylgi mínum verkefnum, ég hef mikla ástríðu fyrir þeim. Mig langar til þess að koma þeim áfram og þannig ætla ég að vinna hér eftir sem hingað til. En jafnframt, af því að ég er samvinnumaður og þú hefur dálítið gagnrýnt hvað ég er að vinna mikið með ólíkum aðilum.“

Ég hef ekkert gagnrýnt það.

„Að þá vil ég líka gera það í samstarfi og samvinnu við ólíka aðila. Ég trúi því svo sannarlega að ef við vinnum þétt saman, þetta samfélag, vinnum ólíkir aðilar saman, þá hreyfum við málin hraðar og við komum breytingunum hraðar í gegn sem hagsmuni fyrir börnin okkar sem eru framtíðin.“

Ég held það velkist enginn í vafa um það. Ásmundur Einar, sem fylgst hefur með þessu gagnvirka samtali okkar að kosningavetur er hafinn.

Viðtalið við Ásmund Einar má sjá og heyra í heild sinni hér fyrir neðan.