Háskólanemar utan EES borgi

Erlendum umsóknum í íslenska háskóla hefur fjölgað hratt og voru t.a.m. umsóknir frá nemendum utan EES fyrir næsta skólaár tæplega tvö þúsund talsins. Samkvæmt upplýsingum blaðsins voru um 1.200 nemendur frá löndum utan EES við háskólanám hér á landi á síðasta ári.

Kostnaður er breytilegur eftir námsbrautum en að sögn Áslaugar Örnu er kostnaður við ódýrustu brautirnar ekki undir einni milljón króna. Innheimta skólagjaldanna geti gefið háskólunum miklar tekjur.

Námsstyrkir fyrir afburðanemendur

Samhliða breytingunum á að taka upp námsstyrki fyrir afburðanemendur frá þessum löndum í þeim tilgangi að efnilegir nemendur hafi áfram tækifæri til náms á Íslandi, óháð efnahag. Markmið breytinganna er m.a. að laga íslenska háskólakerfið betur að alþjóðlegri þróun, efla gæði háskólanáms og styrkja fjárhagslega stöðu opinberu háskólanna í alþjóðlegri samkeppni.

„Við höfum verið að gera gríðarlegar kerfisbreytingar á hvernig fjármögnun til háskóla er háttað og færa hana nær því sem gengur og gerist á Norðurlöndunum, bæði með gagnsærra fyrirkomulagi og með því að breyta magndrifnu kerfi í gæðadrifið,“ segir Áslaug Arna í samtali við Morgunblaðið.

Nánar má lesa um málið í Morgunblaðinu í dag, laugardag.