Fram kemur á vef Veðurstofunnar að mikið hefur dregið úr úrkomu á norðanverðu landinu. Enn er þó óvissustig í gildi á Tröllaskaga vegna skriðufalla en búist er við því að því verði aflétt á morgun.
Fjölmargar skriður féllu um helgina frá því á föstudag í kjölfar mikillar úrkomu.
„Samfara minnkandi úrkomu er farið að draga vel úr rennsli í ám og lækjum á öllu norðanverðu landinu en sums staðar er enn mikið vatn á ferðinni, enn er þó hætta á skriðum og grjóthruni. „Það ætti að draga úr skriðuhættu eftir því sem líður á daginn og rennsli minnkar í ám og lækjum,“ segir í tilkynningu sem birtist í dag.
Á morgun styttir upp og fer að hlýna og má búast við mildu og björtu veðri á norðanverðu landinu.