Einn af göngumönnunum sem slösuðust þegar íshellir hrundi í Breiðamerkurjökli fyrr í dag hefur verið fluttur með þyrlu til Hafnar. Þaðan var hann fluttur með sjúkraflugi á Fossvogsspítala í Reykjavík.

Ásgeir Erlendsson, upplýsingafulltrúi Landhelgisgæslunnar, staðfestir þetta í samtali við blaðamann mbl.is. Maðurinn er talinn alvarlega slasaður. 

Flugvélin hafði þá flogið frá Reykjavík til Hafnar með búnað og birgðir fyrir björgunaraðila. Þegar þyrla gæslunnar lenti á Höfn var hinn slasaði fluttur með flugvélinni til Reykjavíkur og birgðirnar fluttar með þyrlunni að Breiðamerkurjökli, að sögn Ásgeirs.

Fleiri slasaðir hafa ekki verið fluttir með þyrlu að svo stöddu.

Frétt af mbl.is

Fjórir lentu undir ísfargi

Fjórir lentu undir ísfargi

25 manna hóp­ur var í skipu­lagðri ferð um Breiðamerkurjökul með far­ar­stjórn þegar ís­hell­ir hrundi og fjór­ir lentu und­ir ís­fargi. Svo virðist sem veggur hellisins hafi hrunið, að sögn lögreglu. Til­kynn­ing barst viðbragðsaðilum snemma á fjórða tím­an­um í dag.

Að minnsta kosti þrír eru taldir alvarlega slasaðir eft­ir að ís­hell­irinn hrundi. Um­fangs­mikl­ar björg­un­araðgerðir hafa staðið yfir síðan upp úr 15 í dag.

Fjórir lentu undir fargi ís­hell­isins. Tveggja er enn leitað að sögn lögreglu á Suðurlandi en búið er að koma hinum undan farginu og eru þeir báðir alvarlega slasaðir.

Slysið er talið grafal­var­legt. Unnið er að björg­un­ar­störf­um á vett­vangi. Ekki er vitað um frek­ara ástand á fólki á þess­ari stundu, að sögn lög­reglu.

Al­manna­varn­ir hafa virkjað hóp­slysa­áætl­un, opnað sam­hæf­ing­ar­stöð auk þess sem búið er að opna fjölda­hjálp­ar­stöð í Öræf­um.

Þetta vitum við

• Göngufók er fast undir íshelli sem hrundi í Breiðamerkurjökli eftir hádegi í dag. Einn hefur verið fluttur til Reykjavíkur.
• Fjórir lentu undir ísfargi en alls voru 25 manns við hellinn þegar hann hrundi. Tveimur hefur verið komið undan og eru þeir báðir alvarlega slasaðir.
• Tveggja er enn leitað undir farginu og þarf gröfu til að ryðja ísinn frá.
• Almannavarnir hafa virkjað hópslysaáætlun, opnað samhæfingarstöð auk þess sem búið er að opna fjöldahjálparstöð í Öræf­um.
• Tvær þyrlur og ein flugvél hafa verið ræstar út vegna slyssins. Sérþjálfaðir björgunarmenn eru einnig á vettvangi.
• Tilkynning barst viðbragðsaðilum um kl. 15 og hafa að minnsta kosti þrjár björgunarsveitir verið ræstar út.
• Breiðamerk­ur­jök­ull geng­ur niður úr Vatna­jökli og Öræfa­jökli til suðurs og suðaust­urs.

Tengdar fréttir

Banaslys í Breiðamerkurjökli

Lenda í háska í óskipulögðum jöklaferðum

• Íshellaferðir mega hefjast á ný
• Enginn með stöðu sakbornings
• Snúa líklega aftur á jökulinn þar sem einn lést
• Alls ekki hætta sér inn í íshella að sumarlagi

» Fleiri tengdar fréttir

• Blogga um frétt