Enn erfiðara fyrir íbúa að finna stæði

Meðfylgjandi er nýleg mynd af nýbyggingunni sem er íbúðarhús með rýmum á jarðhæðinni sem hugsuð eru fyrir verslun eða þjónustu. Fyrir framan bygginguna er verið að gera göngustíg. Íbúi í hverfinu sem blaðið ræddi við velti því fyrir sér hvort þeim framkvæmdum og frágangi lyki ef til vill ekki fyrr en næsta sumar þar sem nú er nokkuð liðið á sumarið. Íbúar og gestir í hverfinu lögðu gjarnan fyrir framan bygginguna en ekki er gert ráð fyrir bílastæðum þar í framtíðinni. Fyrr í sumar hætti fólk að geta nýtt þau stæði vegna framkvæmdanna hjá borginni.

Annar íbúi í hverfinu sagði mun erfiðara en áður að fá bílastæði nærri heimilinu. Í nýja fjölbýlishúsinu yrðu ekki bílastæði í takt við íbúafjölda og vandinn við að ná bílastæði nærri heimilinu myndi því bara aukast ef eitthvað væri.

Rýmin á jarðhæð til sölu

Rýmin á jarðhæð fjölbýlishússins eru óseld eftir því sem blaðið kemst næst. Um tíma voru viðræður milli Reykjavíkurborgar og eigenda húsnæðisins að nýta rýmið á jarðhæðinni fyrir fjögurra deilda leikskóla eins og greint var frá hér í blaðinu 4. mars síðastliðinn. Þau áform urðu ekki að veruleika en ekki mun vera mjög langt síðan slitnaði upp úr viðræðum. Því hefur líklega ekki reynt á hvernig gangi að selja rýmin á jarðhæðinni sem ekki eru hugsuð sem íbúðir.

Dunhagi 18-20 var upphaflega steinsteypt þrílyft fjölbýlis- og verslunarhús í módernískum stíl, hannað af Þóri Baldvinssyni arkitekt. Verktakafyrirtækið Fjallhagi hf. byggði húsið árið 1959. Húsið var í niðurníðslu og þarfnaðist mikilla endurbóta. Fjárfestar eignuðust húsið 2018 og framkvæmdir hófust í ársbyrjun 2021.