FÍ fagnar Þórsmerkurþjóðgarði, Útivist enn óviss

Ferðafélag Íslands fagnar því að umhverfisráðuneytið íhugi að stofna þjóðgarð í Þórsmörk og nágrenni. Ferðafélagið Útivist hefur aftur á móti ekki tekið afstöðu til hugmyndanna. Útivist hefur áður lagst gegn slíkum áformum en það gæti nú breyst.

Eins og greint var frá í vikunni hefur Guðlaugur Þór Þórðarson, umhverfis-, orku- og loftslagsráðherra, skipað starfshóp til að undirbúa og meta kosti þess að friðlýsa Þórsmörk og nágrenni sem þjóðgarð á grundvelli laga um náttúruvernd.

Bregst hann þar við beiðni sveitarstjórnar í Rangárþingi eystra sem lögðu til í maí að ráðuneytið hæfi skoðun á fýsileika þess að friðlýsa Þórsmörk og nágrenni sem þjóðgarð.

Frétt af mbl.is

Þjóðgarður verði stofnaður í Þórsmörk

Ein af náttúruperlum Íslands

„Við fögnum þessum áformum enda er Þórsmörk ein af perlum íslenskrar náttúru,“ segir Ólöf Kristín Sívertsen, forseti Ferðafélags Íslands (FÍ), í samtali við mbl.is. Félagið fagni jafnframt frumkvæði Rangárþings eystra.

FÍ er með rekstur í Langadal en Ólöf sér ekki fyrir sér að þjóðgarður myndi raska starfsemi félagsins á svæðinu. 

„Við sjáum ekki að þetta eigi eftir að hafa einhver neikvæð áhrif á það sem við erum að gera. Ferðafélagið hefur alltaf náttúruverndarsjónarmið að leiðarljósi í sínum störfum og þetta samræmist okkar sjónarmiðum og því sem við viljum gera í íslenskri náttúru.“

Frétt af mbl.is

Hugmyndir um þjóðgarð í Þórsmörk

Útivist áður lagst gegn þjóðgarði, en það gæti breyst

Guðfinnur Þór Pálsson, formaður Útivistar, segir að stjórn félagsins eigi eftir að taka afstöðu til hugmyndarinnar.

Útivist, sem rekur Bása á Goðalandi, lagðist vissulega gegn áformum um Þórsmerkurþjóðgarð árið 2021, þá í samhengi hálendisþjóðgarðs. „Þá lagðist Útivist gegn þessu á þeim forsendum að Þórsmörk væri í ágætis málum og náttúruvernd væri sinnt, þó vissulega mætti gera betur,“ segir Guðfinnur í samtali við mbl.is.

Frétt af mbl.is

Goðaland og Þórsmörk verði fyrir utan

„En þessi hugmynd er ný af nálinni. Hún er öðruvísi og gengur út á það að sveitarfélagið ætlar að stofna þjóðgarð og reka þjóðgarð og stjórn Útivistar hefur ekki tekið afstöðu til þess,“ bætir hann við.

Spurður út í sína persónulegu skoðun svarar Guðfinnur:

„Mín persónulega skoðun að Þórsmörk sé í ágætis málum og það þurfa að vera frekar góð rök fyrir því ef það á að stofna þjóðgarð þar.“

Frétt af mbl.is

Þjóðgarður í Þórsmörk?

Forseti FÍ segir Þórsmörk vera eina af náttúruperlum landsins. mbl.is/Kristinn Magnússon

• Blogga um frétt