Innlent | mbl | 26.8.2024 | 18:57 | Uppfært 19:29

Fyrirtækið státar sig af íshellaferðum á sumrin

Einn lést eftir að ísfarg hrundi í gær í skipulagðri íshellaferð. mbl.is/RAX

Ferðamennirnir sem lentu undir ísfarginu í Breiðamerkurjökli voru í ferð á vegum ferðaþjónustufyrirtækisins Ice Pic Journeys.

Þetta herma heimildir mbl.is.

Á vefsíðu fyrirtækisins státar það sig af því að vera eitt af fáum fyrirtækjum sem býður upp á íshellaferðir á sumrin.

Persónuleg upplifun

23 manna hópur var á vegum fyrirtækisins í íshellaferð í gær þegar ísveggur gaf sig og hrundi á bandarískt par með þeim afleiðingum að karlmaðurinn lést og konan slasaðist.

Fyrst var talið að 25 væru í hópnum og hefur því umfangsmikil leit staðið yfir í næstum sólarhring sem á annað hundrað hafa komið að.

„Sumartíminn þýðir ekki að engir íshellar séu á Íslandi. Þvert á móti erum við eitt af fáum fyrirtækjum sem eru stöðugt að leita að nýmynduðum hellum og bjóðum ferðir inni í þá utan vetrartímans. Það besta er að við munum að mestu leyti hafa íshellana út af fyrir okkur sem gerir upplifunina enn persónulegri fyrir þig,“ segir á vefsíðu fyrirtækisins.

Viðurkenna að þakið á hellum geti hrunið

Ice Pic Journeys er í eigu tveggja Bandaríkjamanna og á vefsíðu fyrirtækisins er sérstaklega fjallað um íshellaferðir á sumrin.

„Ekki allir átta sig á því að það er hægt að fara í náttúrulegan íshelli yfir sumartímann á Íslandi,“ segir þar, þar sem jafnframt er útskýrt að fyrirtækið vinni ávallt að því að tryggja öryggi fólks.

Þess ber að geta að Sveinn Kristján Rúnarsson, yfirlögregluþjónn hjá lögreglunni á Suðurlandi, sagði í samtali við mbl.is í morgun að ferðamennirnir sem lentu í slysinu hefðu gengið í gegnum ísgöng áður en að hluti af þakinu hefði hrunið.

„Hellarnir okkar á Íslandi eru alltaf að breytast og þegar ísinn bráðnar svo mikið að hann er of þunnur til að bera þyngdina, getur þakið hrunið,“ segir á vefsíðu fyrirtækisins.

„Það er þess vegna sem það er mikilvægt að heimsækja aðeins íshella með vottuðum leiðsögumanni sem þekkir vel til og getur tekið eftir hættum í hellinum fyrir fram,“ segir þar enn fremur.

Þótti leitt að íshellaferðir væru ekki alltaf í boði

Á vefsíðunni segir að einum eiganda fyrirtækisins hefði þótt vera skömm af því að íshellaferðir væru ekki í boði allan ársins hring. Hann byrjaði því að bjóða í íshellaferðir á sumrin.

Ódýrasta íshellaferðin sem fyrirtækið býður upp á á sumrin kostar 30 þúsund krónur.