Yfirgnæfandi meirihluti Íslendinga er jákvæður gagnvart aðild Íslands að Atlantshafsbandalaginu (NATO). Hátt í helmingur þjóðarinnar er þó andvígur því að Ísland veiti Úkraínu beinan hernaðarstuðning.
Þetta kemur fram í könnun Maskínu um viðhorf Íslendinga til ýmissa þátta í utanríkisþjónustu Íslands.
Um 30% landsmanna eru hlynnt því að Ísland veiti Úkraínu beinan hernaðarstuðning í stríðinu við Rússland, til dæmis með því að greiða fyrir hergögn, flutning á þeim og þjálfun hermanna. 48,4% eru andvíg því að Ísland veiti Úkraínu beinan hernaðarstuðning.
Hefur fjöldi þeirra sem er andvígur hernaðarstuðningi aukist frá síðasta ári, þegar 39% voru andvígir. Athygli vakti í kappræðum í aðdraganda forsetakosninganna á Íslandi að Halla Tómasdóttir, forseti Íslands, var á móti hernaðarstuðningi við Úkraínu.
74,6% svarenda segjast þó hlynntir því að Ísland styðji við Úkraínu í stríðinu við Rússland á sama tíma og 9,4% eru því andvígir. Þá eru 86,2% Íslendinga hlynnt því að veita Úkraínu mannúðaraðstoð.
Íslendingar eru þó almennt mjög hlynntir varnarsamstarfi Íslands við önnur vestræn ríki.
64,1% Íslendinga eru jákvæðir gagnvart aðild Íslands að NATO á sama tíma og aðeins 11,2% eru neikvæðir.
Í könnuninni var einnig spurt út í viðhorf fólks til varnarsamningsins við Bandaríkin og út í heræfingar á Íslandi.
Það vill svo til að varnaræfingin Norður-Víkingur hófst í dag og stendur yfir til 3. september. Munu 1.200 manns frá Íslandi, Bandaríkjunum og bandalagsríkjum taka þátt og er æfingin gerð á grundvelli varnarsamnings Bandaríkjanna og Íslands frá árinu 1951.
Aðeins 18,3% Íslendinga eru andvíg varnarsamstarfi við Bandaríkin á sama tíma og 52,8% eru hlynnt.
Þá eru 44,3% Íslendinga hlynnt því að haldnar séu heræfingar hér á landi á sama tíma og 25,8% eru andvíg.