Íbúar á Suðurnesjum gætu fundið fyrir mengun frá gosstöðvunum eftir hádegi í dag.
Þetta segir Minney Sigurðardóttir, náttúruvársérfræðingur á Veðurstofu Íslands, í samtali við mbl.is.
„Það má alveg búast við að það fari smá mengun yfir Keflavík seinnipartinn í dag. En á morgun færist vindur meira í austlæga átt og svo annað kvöld í norðlæga átt. Svo það getur verið einhver gasmengun á Suðurnesjum seinnipartinn í dag og á morgun.“
Aðspurð segir hún gosmengunina ekki vera það mikla að það stafi hætta af henni nema fyrir mjög viðkvæma einstaklinga.