Ógnuðu börnum í Hafnarfirði: Tveir hnepptir í varðhald

Tveir menn hafa verið úrskurðaðir í fjögurra vikna gæsluvarðhald í tengslum við hótanir um líkamsmeiðingar, rán og ofbeldi í garð drengja í Hafnarfirði að undanförnu.

Lögreglan hefur þar haft af­skipti af ung­um mönnum sem hafa ógnað drengjum, hótað að nota hnífa, stolið af þeim fatnaði og krafið þá um að milli­færa fé í gegn­um farsíma þeirra en atvikin áttu sér við Hraunvallarskóla, á Víðistaðatúni og verslunarmiðstöðina Fjörð.

Frétt af mbl.is

Ógnuðu börnum í Hafnarfirði og höfðu af þeim fé

Fæddir 2003 og 2005

Sævar Guðmundsson aðalvarðstjóri segir við mbl.is að á föstudaginn hafi verið gerð krafa um gæsluvarðhald yfir tveimur mönnum sem hafi verið tekin fyrir í Héraðsdómi Reykjaness á laugardaginn.

Mennirnir, sem eru fæddir 2003 og 2005, voru úrskurðaðir í fjögurra vikna gæsluvarðhald eða til 20. september. Sá þriðji er vistaður á Stuðlum þar sem um barnaverndarmál er að ræða.

Sævar segir að allt kapp verði lagt á að ljúka rannsókn á öllum málum sem tengjast mönnunum áður en gæsluvarðhaldsúrskurðurinn rennur út og segir hann að það ætti að takast að gera það.

• Blogga um frétt