Fjöldi ferðamanna hefur lagt leið sína að Grindavíkurvegi til að dást að eldgosinu sem braust út í síðustu viku. Sjónarvottur telur að um nokkur hundruð manns sé að ræða.
Vegurinn er opinn fram að þeim stað sem hraun rann yfir veginn í Svartsengi fyrr í sumar. Hefur tugum bíla verið lagt í vegkantinum.
Eldgosið er því farið að líkjast eldri „túristagosum“ þar sem ferðamenn gátu gert sér leið að gosstöðvunum.
Samkvæmt upplýsingum mbl.is eru fáeinir lögreglubílar á vettvangi að fylgjast með umferðinni.
Sumir ferðamenn virða fyrir sér eldgosið úr fjarska frá Grindavíkurveginum en aðrir ganga út á hraunið til að komast nær gosstöðvunum.
Í upphafi goss var lokað fyrir umferð inn á Grindavíkurveg en ekki er ljóst hvenær opnað var fyrir umferð á veginn.