Innlent | Morgunblaðið | 27.8.2024 | 6:00

Gagnrýnir ferðir í íshella á sumrin

Skráningu í ferðina var ábótavant. Ljósmynd/Ingólfur Guðni Einarsson

Helgi Björnsson, jöklafræðingur og prófessor emeritus við Jarðvísindastofnun Háskóla Íslands, telur stórhættulegt að bjóða upp á ferðir í íshella yfir sumartímann. Hellarnir taki stöðugum breytingum yfir sumarið þegar jökullinn er á meiri hreyfingu. Bíða ætti fram á haust með að fara í slíkar ferðir.

Frétt af mbl.is

Fyrirtækið státar sig af íshellaferðum á sumrin

„Þá er kannski hægt að fara þarna inn og þannig hafa nú þessar ferðir verið til að skoða þessa íshella. Til skamms tíma var þetta bara gert á haustin, í október eða nóvember þegar bráðnun er búin og komin kyrrð yfir þetta og leysingar búnar,“ segir Helgi í samtali við Morgunblaðið.

Einn lést og annar slasaðist alvarlega þegar ísfarg féll á ferðamenn í íshellaskoðun í Breiðamerkurjökli á sunnudag. Maðurinn sem lést og konan sem slasaðist í íshellinum voru par frá Bandaríkjunum. Maðurinn var úrskurðaður látinn á vettvangi en konan flutt með þyrlu Landhelgisgæslunnar á slysadeild í Fossvogi. Er hún ekki talin í lífshættu.

Segir Helgi banaslysið sem varð á sunnudag staðfesta lífshættuna sem fylgi íshellaferðum að sumri til.

Fengu rangar upplýsingar

Björgunaraðgerðum lauk í gær en talið var að tveir til viðbótar hefðu lent undir ísfarginu. Leit hafði staðið yfir síðan seinni part sunnudags.

Ferðaþjónustufyrirtækið sem skipulagði ferðina á Breiðamerkurjökul veitti lögreglu rangar upplýsingar um fjölda ferðamanna í hópnum. Í fyrstu var talið að 25 manns hefðu verið í ferðinni þegar raunverulega var um 23 að ræða.

Upplýsingafulltrúi Landsbjargar segir að fjöldi þeirra sem hafi komið að björgunaraðgerðunum sé hátt í 250. Þá segir lögreglan að mikið þrekvirki hafi verið unnið á vettvangi. Brotið hafi verið niður gífurlegt magn af ís, meira og minna með handafli.

Ferðaþjónustufyrirtækið sem stóð fyrir ferðinni er í eigu tveggja Bandaríkjamanna og á vefsíðu félagsins stærir það sig af því að vera eitt af fáum fyrirtækjum á Íslandi sem bjóða upp á íshellaferðir á sumrin.

Unnið er nú að rannsókn á tildrögum slyssins en lögreglan á Suðurlandi segir rannsóknina á frumstigi. Sveinn Kristján Rúnarsson yfirlögregluþjónn segir ólíklegt að einhver verði sóttur til saka í málinu.

Lesa má meira um málið í Morgunblaðinu í dag.