Konan sem missti meðvitund var í köfunarferð

Konan, sem bjargað var úr Silfru á Þingvöllum eftir að hafa misst meðvitund, var í köfunarferð á vegum ferðaþjónustufyrirtækis. Leiðsögumaður brást skjótt við eftir að ljóst var að ekki var allt með felldu.

Þetta segir Ein­ar Á. E. Sæmundsen, þjóðgarðsvörður á Þing­völl­um, í samtali við mbl.is.

Eins og mbl.is greindi fyrst frá þá var kona á sjötugsaldri dregin upp úr Silfru meðvitundarlaus upp úr klukkan 15 í dag. Fékk hún strax aðhlynningu og komst til meðvitundar, en var þó send með þyrlu Landhelgisgæslunnar á Landspítalann til nánari skoðunar.

Frétt af mbl.is

Meðvitundarlaus kona dregin upp úr Silfru

Leiðsögumaðurinn kom konunni á land

„Það var kona í köfun og það kom eitthvað upp á, henni svelgdist held ég á eða eitthvað og missti tímabundið meðvitund,“ segir Einar.

Konan var í hópi ferðamanna á vegum ferðaþjónustufyrirtækis.

„Hann [leiðsögumaðurinn] tekur hana upp þegar hann sér – þetta bara gerist mjög snöggt. Leiðsögumaðurinn kemur henni á land og nærstaddir aðstoða strax og svo komum við öll. Við vorum 10 manns í þessu,“ segir Einar.

Voru með snöggt viðbragð

Hann man ekki til þess að svona alvarlegt atvik hafi átt sér stað í Silfru á þessu ári þó oft komi upp minniháttar atvik.

Hann segir að sjúkraflutningamaður sé ávallt á Þingvöllum og sinnti hann konunni.

„Við vorum með mjög snöggt viðbragð þannig þetta fór vel,“ segir Einar.

• Blogga um frétt