Nóróveiran gengur enn um hálendið

Fjöldi hópa hefur sýkst af nóróveiru á ferð sinni um hálendi Suðurlands nýverði. Í tilkynningu frá landlækni segir að vonir hafi staðið til að hópsýkingarnar væru yfirstaðnar en í gær bárust fréttir um tvo veika einstaklinga í Hrafntinnuskeri.

„Staðfest hefur verið að yfir sextíu manns veiktust í tengslum við ferðalag eftir Landmannaleið og að yfir fjörutíu hafa veikst nýlega á Laugaveginum. Fjöldi þeirra sem veiktist er þó líklega töluvert hærri þar sem fæstir ferðamenn tilkynna veikindi sín til yfirvalda,“ segir í tilkynningunni.

Þar kemur sömuleiðis fram að nóraveira hafi greinst í alls 11 sýnum frá ferðalöngum á svæðinu.

Frétt af mbl.is

Önnur hópsýking á Suðurlandi

Hafa haft samband við skálana

Þá segir að nóróveira sé afar smitandi og því sé mikilvægt grípa strax til aðgerða til þess að hefta útbreiðslu veirunnar milli manna og út í umhverfið

Heilbrigðiseftirlit Suðurlands hefur haft samband við staðarhaldara í skálum á þeim ferðamannastöðum þar sem sýkingar hafa komið upp og gefin hafa verið út tilmæli um að sjóða allt neysluvatn og að þrífa alla yfirborðsfleti og búnað í skálunum með viðeigandi aðferðum.

Rannsaka vatnsból

Heilbrigðiseftirlitið hefur einnig tekið sýni til rannsókna á neysluvatni í skálum til þess að ganga úr skugga um að vatnsból séu ekki menguð af saurgerlum eða mögulega nóróveiru.

Tekin hafa verið sýni úr skálum á Rjúpnavöllum, Hólaskógi, Áfangagili, Landmannahelli, Landmannalaugum, Hrafntinnuskeri og Álftavatni en áform eru um sýnatökur í Hvanngili, Emstrum og Básum.

Sýnin sem tekin voru á Rjúpnavöllum og Landmannahelli hafa þegar verið greind og kom enginn nóróveira í ljós í þeirri rannsókn.

• Blogga um frétt