Einungis fundist við Kyrrahaf en finnst nú á Íslandi

Sæsnigill, sem nefndur er svartserkur, er ný framandi tegund í fjörum hér við land. Áður hafði hann einungis fundist við austurströnd Kyrrahafs að því er kemur fram í vísindagrein sem starfsmenn Hafrannsóknastofnunar og Náttúrustofu Suðvesturlands hafa birt á vef Cambridge-háskóla.

Vísindamennirnir telja líklegast að dýrin hafi borist til Íslands með skipum, annaðhvort í kjölvatni eða sem ásætur.

Fram kemur á vef Hafrannsóknastofnunar að fyrst haf vart við eggjasekki svartserks, sem eru frekar stórir og áberandi, árið 2020 í Sandgerði og síðar sáust þeir í Fossvogi. Í júní 2022 fundust eggjasekkir við innanverðan Breiðafjörð en í ágúst 2023 fundust fyrstu dýrin í Breiðafirði.

Nyrsta þekkta útbreiðslan við Dýrafjörð

Greint var frá þessari nýju fjörulífveru á líffræðiráðstefnu sl. haust og var óskað eftir upplýsingum um frekari útbreiðslu. Nú hafa bæst við allmargir fundarstaðir, bæði við Faxaflóa og víða í Breiðafirði, m.a. í Hvallátrum.

Í byrjun ágúst voru starfsmenn Hafrannsóknastofnunar staddir í botni Dýrafjarðar þegar þeir rákust á eggjasekki og dýr. Eins fundust svartserkir og egg í Arnarfirði og á Barðaströnd. Segir á vef Hafró að nyrsta þekkta útbreiðsla svartserks sé því við Dýrafjörð en trúlega sé hann að finna víðar á Vestfjörðum.

Svartserkur hefur aðallega fundist á skjólsælum leirum. Dýrin ferðast um hulin seti og því getur verið erfitt að koma auga á þau en eggjasekkina er auðvelt að sjá.

Sæsnigill af sömu ættkvísl en annari tegund hefur fundist á Madeira, Kanaríeyjum og Grænhöfðaeyjum.