Lögreglan á höfuðborgarsvæðinu handtók í dag mann eftir að hann réðst á einstakling í verslun. Fyrr um daginn hafði lögregla þurft að hafa afskipti af manninum í annarri verslun í miðborg Reykjavíkur þar sem hann öskraði á fólk, stal vörum og æsti sig við starfsmenn.
Þetta kemur fram í dagbók lögreglu þar sem greint er frá verkefnum hennar frá klukkan 5 í morgun til klukkan 17 í dag.
Þar segir að lögreglu hafi borist tvær tilkynningar vegna mannsins í dag. Í seinna skiptið var maðurinn til ama í verslun og var hann handtekinn eftir að hafa ráðist á þann sem tilkynnti hann til lögreglu.
Maðurinn var vistaður í fangaklefa vegna málsins.
Þá var tilkynnt um árekstur í Kópavogi.
Þar hafði einni bifreið verið ekið yfir gatnamót gegn rauðu ljósi sem hafnaði á tveimur öðrum bifreiðum, annarri sem var á ferð yfir gatnamótin gegn grænu ljósi og hinni sem var kyrrstæð. Ekki urðu alvarleg slys á fólki.