Bæjarstjórinn ósammála ritara Sjálfstæðisflokksins
Stefán E. Stefánsson
Setja bókamerki
Ásdís Kristjánsdóttir, bæjarstjóri í Kópavogi segir að nauðsynlegt hafi verið að ríkissjóður kæmi að rekstri almenningssamgangna á höfuðborgarsvæðinu. Um það var samið í uppfærðum samgöngusáttmála sem kynntur var fyrr í mánuðinum. Stofnkostnaður vegna hans nemur 311 milljörðum króna en fyrri áætlanir gerðu ráð fyrir 160 milljarða fjárfestingu í verkefninu.
Enn liggur ekki allt fyrir um það hver rekstrarkostnaður borgarlínu og strætókerfis við hlið hennar mun kosta en ljóst er að kerfið verður margfalt dýrara en núverandi almenningssamgöngukerfi á höfuðborgarsvæðinu.
Ásdís segir að Kópavogur hafi sett þátttöku ríkissjóðs í rekstrinum sem skilyrði fyrir undirritun samgöngusáttmálans. Vilhjálmur Árnason, ritari Sjálfstæðisflokksins hafði, þegar fyrsta útfærsla sáttmálans gekk í gegn, sett það sem skilyrði fyrir samþykkt hans að ríkinu yrði haldið fyrir utan reksturinn.
Því er ljóst að hann hefur orðið undir í þessu máli en bæjarstjóri Kópavogs og samflokksmaður hans haft yfirhöndina.
Um þetta er rætt í nýjasta þætti Spursmála þar sem Ásdís er gestur ásamt Davíð Þorlákssyni, framkvæmdastjóra Betri samgangna ohf.
Orðaskiptin um þetta efni má sjá í spilaranum hér að ofan en þau eru einnig rakin í textanum hér að neðan.
Tryggir fjármagn til rekstursins
Ríkið er að fara að taka að sér rekstur almenningssamgangna á höfuðborgarsvæðinu. Samflokksmaður þinn, Vilhjálmur Árnason, ritari Sjálfstæðisflokksins, setti sem skilyrði fyrir samþykki samgöngusáttmálans áður að ríkið yrði ekki tengt inn í þá hít sem rekstur Strætó bs. og þessi rekstur allur á almenningssamgöngukerfinu sjálfu er. Er það ekki bitlingurinn sem þið fáið fyrir að samþykkja þetta í Kópavogi, Hafnarfirði og Garðabæ?
„Alls ekki, ég horfi á þetta...“
Þetta léttir á ykkur.
„Hagsmunir höfuðborgarbúa eru þeir að við tryggjum að við fáum fjármagn til uppbyggingu stofnvega, göngu- og hjólastíga og til að bæta þjónustu strætó.“
Hagsmunir ykkar eru sem sagt þeir að fólkið á Akureyri og Raufarhöfn og Egilsstöðum og Höfn í Hornafirði, það borgi rekstrarkostnaðinn af borgarlínunni?
„Borgi rekstrarkostnaðinn af borgarlínunni? Ja þetta er bara það sem tíðkast líka erlendis þegar þú ert með hágæða almenningssamgöngur á höfuðborgarsvæðinu.
En ég ætla aðeins að bregðast við þessu. Vilhjálmur var með þetta sem skilyrði. Ég var líka með skilyrði um að ef við tækjum þátt í samgöngusáttmálanum þá kæmi ekki til greina að sveitarfélögin ein myndu reka hágæða almenningssamgöngur. Það var alveg skilyrði fyrir aðkomu okkar að þessum sáttmála, að við myndum ekki vera ein...“
Þannig að ritari flokksins hefur orðið undir í ágreiningi milli ykkar?
Þjónustan fyrir neðan allar hellur
„Ég ætla nú ekki að fara að tala um samflokksfélaga mína.“
Er það ekki augljóst?
„En ég vil aðeins með þjónustu strætó, þetta var svo góður punktur áðan, strætó er bara fastur í umræðunni núna og kemst ekkert. Tómur segir þú, ja ég er ekki sammála. Hann er sem betur fer fullur af framhaldsskólanemum á morgnanna. Nú eru börnin mín að byrja í framhaldsskóla, og fyrstu vikuna sem þau byrjuðu í framhaldsskóla, þau auðvitað taka strætó á hverjum einasta degi og samviskusamlega mæta á réttum tíma á stoppistöðina til þess að mæta ekki of seint í skólann. Ja, fyrstu vikuna, fyrsti dagurinn þá mætti strætó ekki vegna þess að hann var fastur í umferð, nú hina vikuna kom hann alltof seint af því að hann var fastur í umferð. Þetta er þjónusta sem við getum ekki boðið upp á. Og af hverju erum við þá að fara aðra leið með því að hafa þessa sérrein, það er vegna þess að við verðum að tryggja tíðni almenningssamgangna, verðum að tryggja það að þeir sem eru að nota þessar almenningssamgöngur geti treyst því að strætó mæti á réttum tíma og skili fólki á réttum tíma á áfangastað sem og líka að þau séu ekki föst í umferð,“ segir Ásdís.
Tíðkast víða erlendis
Og Davíð leggur orð í belg:
„Má ég aðeins varðandi aðkomu hins opinbera að almenningssamgöngum. Í öllum löndunum sem við berum okkur saman við kemur hið opinbera að almenningssamgöngum, kemur að fjármögnun almenningssamgöngum í borgum.“
Hafa gert það síðan 2012.
Loftbrú og ferjusiglingar eru almenningssamgöngur
„Og það er ekki bara á höfuðborgarsvæðinu sem ríkið er að setja peninga í almenningssamgöngur víða um land. Það er verið að keyra strætisvagna víða um landið, það eru ferjusiglingar á að minnsta kosti tveimur eða þremur sem ég man eftir eða fleirum. Loftbrúin, þetta eru almenningssamgöngur, þetta er flokkað sem almenningssamgöngur í bókhaldi ríkisins. Og miðað við höfðatölu sé ríkið enn þá að setja meira í almenningssamgöngur úti á landi heldur en á höfuðborgarsvæðinu.“
En munurinn á þessu og siglingunum er að fólk kemst á milli staða í siglingunum og loftbrúnni en það sem menn hafa gert hér síðan 2012, og það er þess vegna sem sporin hræða. Menn hafa sett milljarð á ári, og sú upphæð hefur verið uppfærð, frá 2012 og markmiðið var að fjölga notendum strætó úr 4% í 8%. Og hvernig hefur það gengið. Það hefur ekki gengið?
„Var það markmiðið?“
Það var markmiðið. Það hefur ekki gengið.
„Já, en Stefán, af hverju gekk það ekki? Það er vegna þess að strætó er fastur í umferð og hvað erum við að fara að gera núna? Við erum að fara að búa til almenningssamgöngur þannig að þau geti komist til og frá án þess að vera föst í umferðinni. Það er það sem við þurfum að gera,“ bætir Ásdís við að lokum.
Viðtalið við Ásdísi og Davíð má sjá í spilaranum hér að neðan. Auk þeirra mættu í þáttinn þau Hermann Nökkvi Gunnarsson blaðamaður og Ólína Kjerúlf Þorvarðardóttir, forseti félagsvísindadeildar Háskólans á Bifröst.
„Við verðum að vinda ofan af þessu“
Gerbreytt staða hælisleitarmála
„Vandamálið er ekki fólkið hérna inni“
Harris segir Trump hafa vanvirt helga jörð
Dómari telur að Daði hafi logið
Hinn almenni Íslendingur tengi ekki við flokkinn í dag