„Það var víðáttumikil lægð um helgina stödd vestur af landinu á Grænlandshafi. Hún var að dæla að okkur hlýju og röku lofti sem varð til þess að það var mikil úrkoma sunnan- og vestanlands.“

Þetta segir veðurfræðingur á Veðurstofu Íslands í samtali við mbl.is um veðrið um helgina.

Hann segir að það hafi verið gular veðurviðvaranir á spásvæði vegna úrkomu.

Frétt af mbl.is

Gul viðvörun víða um land

„Svo var líka nokkuð hvasst inn á milli þannig að það voru viðvaranir vegna hvassviðris til dæmis á Breiðafirði og líka á Norðurlandi eystra og Austurlandi í dag.“

Hann segir að með hlýja loftinu hafi orðið mikið blíðviðri á Norðurlandi og Austurlandi um helgina. Hiti hafi víða farið yfir 20 stig og náði að 25 stigum á Skjaldþingsstöðum á laugardag.

Væta með köflum í flestum landshlutum

Aðspurður segist hann ekki hafa fengið veður af stórum skriðum sem féllu vegna rigninga helgarinnar.

Hvernig er útlitið fyrir þessa viku?

„Það er að draga úr krafti lægðarinnar og á morgun dregur úr vindi og úrkomu víðast hvar. Það verður einhver væta með köflum í flestum landshlutum,“ segir hann.

Á þriðjudag verði vindurinn norðvestlægri og þá kólni aðeins fyrir norðan.

„Það bætir í úrkomu þar en það léttir til sunnan heiða og svo snýst aftur í suðvestlæga átt um miðja vikuna með rigningu hérna sunnan- og vestanlands þannig það er útlit fyrir vætutíð sunnanlands í þessari viku,“ segir hann að lokum.

Tengdar fréttir

Veður

Gular viðvaranir taka gildi eftir hádegi

• Bætir í úrkomu á vestanverðu landinu
• Hitinn fór upp í 15 stig
• Væta með köflum og hlýjast syðst
• Veðurviðvaranir vegna hvassviðris og hláku

» Fleiri tengdar fréttir

• Blogga um frétt