Lögreglunni hefur ekki borist tilkynning um árás sem fjallað var um á íbúðasíðunni Íbúasamtökin betra Breiðholt í gær.
Þar segist kona hafi orðið vitni að líkamsárás fyrir utan Breiðholtslaug klukkan 13.35 í gær þar sem hópur ungra krakka hafi verið að berja, sparka í og traðka á unglingsdreng sem var á leið með vinum sínum í sund.
„Hann var vankaður eftir þung og mikil högg og í áfalli og afþakkaði alla aðstoð bæði frá mér og starfsfólki laugarinnar,“ skrifar konan meðal annars í færslunni.
Gunnar Hilmarsson, aðalvarðstjóri hjá lögreglunni á lögreglustöð 3, sem sinnir verkefnum í Breiðholti og Kópavogi, segir í samtali við mbl.is að lögreglunni hafi ekki borist nein tilkynning um árásina og hún sé því ekki til rannsóknar.